ᐃᓕᓵᑦ ᐊᑑᑎᓯᒪᔭᒥᓂᒃ ᐅᓂᒃᑳᑐᑦ

ᐊᑦᔨᐅᖏᑦᑐᖅ ᑯᐯᒃᒥ, ᓄᓇᕕᒃ ᓯᕗᓂᑦᓴᕗᑦ ᑐᓂᓯᓲᖅ ᐊᑕᐅᓯᕐᒥᒃ ᐊᕐᕌᒍᕐᒥ ᐃᓕᓐᓂᐊᑎᑦᓯᓂᕐᒥᒃ ᐃᓄᐃᑦ ᒥᑦᓵᓄᑦ ᐊᒻᒪᓗ ᓯᓚᕐᔪᐊᒥ ᐅᑭᐅᕐᑕᑐᖏᓐᓂ ᐱᓂᐊᕐᓂᕆᖃᑦᑕᓯᒪᔭᖏᓐᓂᒃ, ᐱᓂᐊᕐᓂᓕᕆᓂᕐᓂᒃ, ᐊᐅᓚᑦᓯᓂᕐᒥᒃ, ᐃᓕᕐᕐᑯᓯᕐᒥᒃ ᐅᖃᐅᓯᕐᒥᓗ. ᐃᓕᓐᓂᐊᑏᑦ ᕿᒥᕐᕈᓂᖃᓲᑦ ᓯᓚᕐᔪᐊᒥ ᐱᓂᐊᕐᓂᖃᕈᑕᐅᔪᓂᒃ ᐃᓄᐃᑦ ᐃᓱᒪᒍᓯᖓᓂᒃ ᐊᑐᕐᓱᑎᑦ. ᐃᓕᓐᓂᐊᓂᕐᒥᓂᒃ, ᐱᓂᖃᓲᑦ ᐱᒻᒪᕆᕋᑕᕐᓂᒃ ᐃᓱᒪᒍᓐᓇᓯᓂᕐᒥᒃ ᓄᓇᕕᐅᑉ ᒥᑦᓵᓄᑦ, ᐃᓄᖏᓐᓂᒃ ᐃᓕᕐᕐᑯᓯᖏᓐᓂᓗ.

ᑖᓐᓇ ᐃᓕᓐᓂᐊᓂᖅ ᐅᒃᑯᐃᓯᒍᓐᓇᓯᐊᕐᑐᖅ ᑐᑭᓯᓴᖃᑎᒌᕝᕕᐅᒍᑎᑦᓴᓂᒃ ᐊᑦᔨᒌᖕᖏᑐᓂᒃ ᐊᖓᔪᕐᖄᑕ, ᐊᑖᑕᑦᓯᐊᑯᑦᑕ, ᐊᓈᓇᑦᓯᐊᑯᑦᑕᓗ ᐅᖄᓚᐅᕐᓯᒪᓐᓂᖏᑦᑕᖏᓐᓂᒃ ᖃᐅᔨᕕᐅᒍᓐᓇᕋᒥ (ᐅᐱᓐᓇᕋᓂᐅᕐᖂᑐᖅ ᐋᓐᓂᓇᕐᑑᒍᓈᓘᓐᓂᒪᑕ ᑕᒪᒃᑯᐊ ᓵᖕᖓᒐᓱᐊᕆᐊᑦᓴᒃ) ᖃᓪᓗᓈᓂᒃ ᑕᑯᒋᐅᕐᓱᑎᒃ ᐊᒻᒪᓗ ᐱᕐᕈᓯᖏᑦ ᓄᖑᑎᕐᑕᐅᕙᓪᓕᐊᑕᕋᓱᐊᓕᕐᑎᓗᒋᑦ ᐊᑑᑎᓪᓚᕆᓯᒪᔭᕕᓂᖏᑦ ᑖᒃᑯᓚᕆᐅᑦᓱᑎᒃ.

- ᓕᓯ ᓇᐅᔭ, ᐃᓄᒃᔪᐊᖅ/ᒪᓐᑐᔨᐊᓪ

ᑖᓐᓇ ᐃᓕᓐᓂᐊᓂᖅ ᐊᓯᑦᔨᑕᐅᒍᑎᒋᒻᒪᕆᑦᑕᕋ ᑕᑯᓐᓇᕈᓯᒃᑯᑦ ᓱᓇᓕᒫᓂᒃ. ᓄᓇᕕᒻᒧᑦ ᑕᒪᓐᓇ ᑭᖕᖒᒪᒋᔭᐅᓪᓚᕆᑦᑐᖅ, ᓄᓇᕕᒻᒧᓗ ᑕᒪᓐᓇ ᐱᔪᒪᔭᐅᒻᒪᕆᓕᕐᓱᓂ.

- ᒥᐊᔨ ᓵᓐᑕ, ᑰᑦᔪᐊᖅ

ᐃᓕᓐᓂᐊᑕᓕᒫᕗᑦ ᑕᒃᑯᓗᑐᑦᓱᑎᒃ ᐃᓕᓐᓂᐊᑕᐅᒋᐊᖃᓕᕐᑐᐃᓗ ᐃᓕᓐᓂᐊᕕᓐᓂ ᐳᕐᑐᓂᕐᐹᓂ ᓄᓇᕕᒻᒥ.

- ᓕᓯ ᓄᕙᓕᖕᖓᖅ, ᐅᒥᐅᔭᖅ

ᐱᑐᑦᓯᒪᓂᕐᓴᒪᕆᐊᓘᔮᓕᕇᕐᓇᖁᕐᓕ ᐊᒫᖏᓐᓄᑦ ᓯᕗᓪᓕᕕᓂᑦᑕ.

- ᓕᓯ ᓇᐅᔭ, ᐃᓄᒃᔪᐊᖅ/ᒪᓐᑐᔨᐊᓪ

ᐅᕕᒃᑫᑦ ᐅᓪᓗᒥ, ᐅᓄᕐᓂᐹᑦᓯᐊᖑᒻᒪᑕ ᐅᓪᓗᒥᐅᔪᖅ ᐃᓄᖏᓐᓂᑦ ᓄᓇᕕᒻᒥᐅᑦ, ᐃᓕᑦᓯᒍᒪᓪᓚᕆᑦᑐᑦ ᑭᓇᒃᑯᓴᔭᐅᒻᒪᖔᕐᒥᒃ, ᐃᓅᖃᑎᒌᑎᒍᓪᓗ ᖃᓄᐃᓕᖓᔪᒥᒃ ᑐᑭᓯᒪᔭᐅᒍᓯᖃᕐᒪᖔᕐᒥᒃ.

- ᓕᓯ ᓇᐅᔭ, ᐃᓄᒃᔪᐊᖅ/ᒪᓐᑐᔨᐊᓪ

ᓄᓇᕕᒃ ᓯᕗᓂᒃᓴᕗᑦ ᐃᓕᓭᓲᖅ ᐃᓄᓐᓂᒃ ᒪᒥᓚᕿᑦᓱᒋᑦ ᓯᕗᓕᕕᓂᑦᑎᒎᕐᓱᑎᒃ-ᑭᖑᕐᖑᓯᒍᑎᒋᓯᒪᔭᕗᓐᓂᒃ ᖁᐊᕐᓵᓯᒪᓂᑎᒍᑦ ᐊᑑᑎᖃᑦᑕᓯᒪᔭᖏᓐᓂᒃ ᓄᓇᕐᖃᑎᒋᓚᐅᕐᓯᒪᓐᓂᖏᑦᑕᒥᓂᒃ ᑲᑎᓯᐅᕐᖃᐸᓪᓕᐊᓕᕐᓱᑎᒃ ᐊᑑᑎᔭᐅᖃᑦᑕᓯᒪᔪᑎᒍᑦ.

- ᓄᐃᒥ ᐋᕐᖓᖅ, ᑲᖏᕐᓱᔪᐊᖅ

ᐃᓕᓐᓂᐊᑕᓕᒫᕗᑦ ᐃᓄᐃᑦ ᐃᓗᕐᕈᓯᖓᓂᒃ ᓲᖑᓭᒍᑎᑦᓯᐊᑦ, ᐃᓕᑕᕐᓇᐅᑎᖏᓐᓂᒃ, ᐅᖃᐅᓯᖏᓐᓂᒃ, ᐃᓪᓕᕆᔭᖏᓐᓂᒃ ᐱᒋᐊᕐᕕᓴᓪᓚᕆᐊᓘᓕᕐᓱᓂᓗ ᖁᓱᖕᒉᑦᔪᑎᑦᓴᓕᐅᕐᓂᒥᒃ ᑕᕝᕙᓂᑦᓭᓈᕐᑎᑕᐅᑲᓪᓚᑐᐃᓐᓇᖏᓐᓂᒥᓪᓗ.

- ᓕᓯ ᓄᕙᓕᖕᖓᖅ, ᐅᒥᐅᔭᖅ

ᐃᓕᓐᓂᐊᕋᑦᓴᖃᑦᔭᖏᓪᓚᖅ ᑌᒣᑦᑐᒋᐊᓪᓚᓂᒃ ᓄᓇᕕᒃ ᓯᕗᓂᑦᓴᕗᑦ ᒪᓂᒪᑎᑕᖏᑦᑕ ᐊᑦᔨᖏᓐᓂᒃ ᓄᓇᕕᒻᒥ. ᑭᖕᖒᒪᓇᕐᑐᓚᕆᐊᓗᒃ ᐃᓕᓭᒍᑎᑦᓴᐅᓗᓂ ᐃᓕᓴᕐᑕᐅᒍᓐᓇᕕᑦᓴᖏᓐᓂᒃ ᐃᓄᖁᑎᑦᑕ ᒥᑦᓵᓅᓕᖓᔪᓂᒃ ᐊᑑᑎᓚᐅᕐᑐᕕᓂᕐᓂᒃ, ᑕᕝᕘᓇᑦᓭᓇᕐᓗ ᐃᓕᓐᓂᐊᕕᒻᒪᕆᒻᒥ ᖃᕝᕙᕆᐊᕈᑎᑖᕐᕕᐅᒍᓐᓇᓱᓂ.

- ᓕᓯ ᓇᐅᔭ, ᐃᓄᒃᔪᐊᖅ/ᒪᓐᑐᔨᐊᓪ

ᓄᓇᕕᒃ ᓯᕗᓂᑦᓴᕗᑦ ᐅᐃᑎᑕᐅᓐᓇᑐᓪᓚᕆᒃ ᓇᑭᓂᑕᐅᒻᒪᖔᕐᒥ ᑐᑭᓯᑦᓯᐊᓇᕐᑑᒐᒥ ᐃᓄᑐᐃᓐᓇᐅᓂᑎᒍᑦ.

- ᒥᐊᔨ ᓵᓐᑕ, ᑰᑦᔪᐊᖅ

ᓄᓇᕕᒃ ᓯᕗᓂᑦᓴᕗᑦ ᑲᓲᑎᑦᓯᐊᑐᖅ ᓄᓇᕕᒻᒥᐅᑦ ᐃᓕᓐᓂᐊᓂᕆᒋᐊᓕᖏᓐᓂᒃ ᓇᓚᐅᑦᓱᒍ.

- ᓕᓯ ᓄᕙᓕᖕᖓᖅ, ᐅᒥᐅᔭᖅ

ᓄᓇᕕᒃ ᓯᕗᓂᑦᓴᕘᒃᑯᓂ ᐃᓄᓐᓂᒃ ᐃᓗᐃᑦᑐᖑᕐᑎᓯᐅᑎᐅᒍᓐᓇᓯᐊᕐᑐᖅ, ᑎᑭᐅᑎᔭᓕᐅᕐᓂᕐᓴᐅᒍᑎᒋᓕᕐᓗᒍᓗ ᑲᑎᕐᓱᑕᐅᒪᕕᐊᐱᒻᒦᑐᐃᓐᓇᕈᓐᓀᓯᓗᑕ ᓄᓇᓕᑐᖃᑦᓴᔭᕐᑎᒍᑦ.

- ᓕᓯ ᓇᐅᔭ, ᐃᓄᒃᔪᐊᖅ

ᐃᓕᓐᓂᐊᓕᕐᓱᑕ ᐊᑕᐅᓰᑐᓐᓇᐅᖏᓐᓇᑐᒥᒃ ᐃᓕᓐᓂᐊᓂᕐᒥᒃ, ᑐᑭᓯᒪᑦᓯᐊᓂᕐᓴᒪᕆᐊᓘᔪᕆᓕᕐᖁᖓ ᐃᓅᖃᑎᒃᑲᓂᒃ, ᑖᒃᑯᓄᖓᓗ ᐃᓅᖃᑎᒋᔭᐅᒋᐊᖅ ᐅᐱᒪᒻᒪᕆᐅᑎᒋᓕᕐᖃᕋ ᓱᖁᓯᔪᐃᑦᑐᐊᓗᓐᓄᑦ ᓲᖑᔪᑦᓴᔭᕐᔪᐊᖑᑦᓱᑎᓪᓗ.

- ᓇᐅᔭ ᕕᑖᓪ, ᑲᖏᕐᓱᐊᓗᒃᔪᐊᖅ/ᒪᓐᑐᔨᐊᓪ

ᐃᓕᓐᓂᐊᕕᒻᒦᓚᐅᔪᒐᒪ ᐳᕐᑐᓂᕐᓴᒥ ᖃᓪᓗᓈᑦ ᓄᓇᖓᓂ (....). ᐃᓄᒃᑎᑑᕈᓯᖓ ᐊᑐᐊᕐᓯᒍᓯᒐᓗ ᐱᐅᓯᐅᒥᓯᒪᔪᒻᒪᕆᐅᓕᕐᑑᒃ ᑌᒪᖕᖓᓂᑦ ᐱᒋᐊᓚᐅᔪᑎᓪᓗᖓ ᐃᓕᓐᓂᐊᓂᕋᓂᒃ. ᐃᓄᐃᑦ ᐃᓅᖃᑎᒋᕙᑦᑕᑲ ᐅᓪᓗᒥ ᐅᖄᓂᓴᐅᓲᖑᓂᕃᓕᕐᑐᑦ ᐃᓄᒃᑎᑐᑦ ᐅᕙᓐᓂᒃ.

- ᐋᓐᔨᓚ ᒧᐊᖃᐅᔅ, ᐃᓄᒃᔪᐊᖅ/ᒪᓐᑐᔨᐊᓪ

ᓄᓇᕕᒃ ᓯᕗᓂᕐᓴᕗᑦ ᐃᓕᓐᓂᐊᕋᑦᓴᓚᕆᐊᓗᒃ ᐃᓄᓐᓄᑦ ᐃᒻᒥᓂᒃ ᑭᓇᒃᑯᓴᔭᐅᒻᒪᖔᕐᒥᒃ ᐃᓕᑕᕐᓂᐊᕈᒪᔪᓄᑦ, ᓯᕗᓕᕐᑎᖑᓚᕿᕋᑕᕐᐸᓕᕐᓗᑎᐊᓪᓛᑦ ᓄᓇᕕᒻᒥᒃ ᐱᒻᒪᕆᐅᑎᓂᒃ ᐊᓯᑦᔨᑐᕃᖃᑕᐅᒍᓐᓇᓯᓚᕿᓗᑎᐊᓪᓛᓗ.

- ᐋᓐᔨᓚ ᒧᐊᖃᐅᔅ, ᐃᓄᒃᔪᐊᖅ/ᒪᓐᑐᔨᐊᓪ