ᐃᓕᓵᑦ ᐊᑑᑎᓯᒪᔭᒥᓂᒃ ᐅᓂᒃᑳᑐᑦ

ᓄᓇᕕᒃ ᓯᕗᓂᕐᓴᕗᑦ ᐃᓕᓐᓂᐊᕋᑦᓴᓚᕆᐊᓗᒃ ᐃᓄᓐᓄᑦ ᐃᒻᒥᓂᒃ ᑭᓇᒃᑯᓴᔭᐅᒻᒪᖔᕐᒥᒃ ᐃᓕᑕᕐᓂᐊᕈᒪᔪᓄᑦ, ᓯᕗᓕᕐᑎᖑᓚᕿᕋᑕᕐᐸᓕᕐᓗᑎᐊᓪᓛᑦ ᓄᓇᕕᒻᒥᒃ ᐱᒻᒪᕆᐅᑎᓂᒃ ᐊᓯᑦᔨᑐᕃᖃᑕᐅᒍᓐᓇᓯᓚᕿᓗᑎᐊᓪᓛᓗ.

- ᐋᓐᔨᓚ ᒧᐊᖃᐅᔅ, ᐃᓄᒃᔪᐊᖅ/ᒪᓐᑐᔨᐊᓪ

ᓄᓇᕕᒃ ᓯᕗᓂᑦᓴᕗᑦ ᑲᓲᑎᑦᓯᐊᑐᖅ ᓄᓇᕕᒻᒥᐅᑦ ᐃᓕᓐᓂᐊᓂᕆᒋᐊᓕᖏᓐᓂᒃ ᓇᓚᐅᑦᓱᒍ.

- ᓕᓯ ᓄᕙᓕᖕᖓᖅ, ᐅᒥᐅᔭᖅ

ᓄᓇᕕᒃ ᓯᕗᓂᑦᓴᕗᒻᒧᑦ ᐃᓚᐅᒍᒪᓚᕿᓚᐅᔪᕗᖓ ᑖᓐᓇ ᐃᓕᓐᓂᐊᒐᖅ ᐃᓄᒃᑎᑐᒃ ᐅᖃᐅᓯᕐᒥ ᐃᓕᓐᓂᐊᒐᕐᓂᒃ ᐃᓕᓐᓂᐊᑎᑦᓯᓲᖑᓂᖓᓄᑦ.  ᓱᓇᒥᓪᓘᓃᑦ ᐅᒡᒍᐊᕈᑎᑦᓴᖃᖕᖏᑐᖓ!

- ᓯᐊᔭ ᖁᒪᖅ , ᐊᑯᓕᕕᒃ

ᑐᒥᓕᐅᕐᐳᖓ ᕿᑐᕐᖓᑲᓄᑦ ᑐᑦᔭᑕᐅᓂᐊᕐᑐᓂᒃ.  ᓄᓇᕕᒃ ᓯᕗᓂᑦᓴᕗᒻᒥ ᐊᓂᒎᑎᓯᒪᔭᒃᑲ ᐊᖏᔪᒥᒃ ᐱᔭᖃᕐᓂᒥᒃ ᐃᑉᐱᓂᐊᕐᓇᑐᖅ.

- ᓯᐊᔭ ᓵᒥᓵᒃ, ᐃᓄᒃᔪᐊᒃ

ᐃᓕᓐᓂᐊᕋᑦᓴᖃᑦᔭᖏᓪᓚᖅ ᑌᒣᑦᑐᒋᐊᓪᓚᓂᒃ ᓄᓇᕕᒃ ᓯᕗᓂᑦᓴᕗᑦ ᒪᓂᒪᑎᑕᖏᑦᑕ ᐊᑦᔨᖏᓐᓂᒃ ᓄᓇᕕᒻᒥ. ᑭᖕᖒᒪᓇᕐᑐᓚᕆᐊᓗᒃ ᐃᓕᓭᒍᑎᑦᓴᐅᓗᓂ ᐃᓕᓴᕐᑕᐅᒍᓐᓇᕕᑦᓴᖏᓐᓂᒃ ᐃᓄᖁᑎᑦᑕ ᒥᑦᓵᓅᓕᖓᔪᓂᒃ ᐊᑑᑎᓚᐅᕐᑐᕕᓂᕐᓂᒃ, ᑕᕝᕘᓇᑦᓭᓇᕐᓗ ᐃᓕᓐᓂᐊᕕᒻᒪᕆᒻᒥ ᖃᕝᕙᕆᐊᕈᑎᑖᕐᕕᐅᒍᓐᓇᓱᓂ.

- ᓕᓯ ᓇᐅᔭ, ᐃᓄᒃᔪᐊᖅ/ᒪᓐᑐᔨᐊᓪ

ᓄᓇᕕᒃ ᓯᕗᓂᒃᓴᕗᑦ ᐃᓕᓭᓲᖅ ᐃᓄᓐᓂᒃ ᒪᒥᓚᕿᑦᓱᒋᑦ ᓯᕗᓕᕕᓂᑦᑎᒎᕐᓱᑎᒃ-ᑭᖑᕐᖑᓯᒍᑎᒋᓯᒪᔭᕗᓐᓂᒃ ᖁᐊᕐᓵᓯᒪᓂᑎᒍᑦ ᐊᑑᑎᖃᑦᑕᓯᒪᔭᖏᓐᓂᒃ ᓄᓇᕐᖃᑎᒋᓚᐅᕐᓯᒪᓐᓂᖏᑦᑕᒥᓂᒃ ᑲᑎᓯᐅᕐᖃᐸᓪᓕᐊᓕᕐᓱᑎᒃ ᐊᑑᑎᔭᐅᖃᑦᑕᓯᒪᔪᑎᒍᑦ.

- ᓄᐃᒥ ᐋᕐᖓᖅ, ᑲᖏᕐᓱᔪᐊᖅ

ᐃᓕᓐᓂᐊᓕᕐᓱᑕ ᐊᑕᐅᓰᑐᓐᓇᐅᖏᓐᓇᑐᒥᒃ ᐃᓕᓐᓂᐊᓂᕐᒥᒃ, ᑐᑭᓯᒪᑦᓯᐊᓂᕐᓴᒪᕆᐊᓘᔪᕆᓕᕐᖁᖓ ᐃᓅᖃᑎᒃᑲᓂᒃ, ᑖᒃᑯᓄᖓᓗ ᐃᓅᖃᑎᒋᔭᐅᒋᐊᖅ ᐅᐱᒪᒻᒪᕆᐅᑎᒋᓕᕐᖃᕋ ᓱᖁᓯᔪᐃᑦᑐᐊᓗᓐᓄᑦ ᓲᖑᔪᑦᓴᔭᕐᔪᐊᖑᑦᓱᑎᓪᓗ.

- ᓇᐅᔭ ᕕᑖᓪ, ᑲᖏᕐᓱᐊᓗᒃᔪᐊᖅ/ᒪᓐᑐᔨᐊᓪ

ᐃᓕᓐᓂᐊᓂᕋᓂᒃ ᐳᕐᑐᓂᕐᓴᒋᐊᓪᓚᒥ ᑲᔪᓯᒍᒪᓚᐅᔪᒐᒪ.  ᐃᓗᕐᕈᓯᑦᑎᓅᓕᖓᔪᓂᒃ ᑭᖑᓂᕐᒥᓗ ᐃᕐᖃᓇᕐᑐᖁᑎᕗᓐᓂᒃ ᐃᓕᑦᓯᒍᓐᓇᓯᓚᐅᔪᕗᖓ.  ᐅᕙᓐᓄᑦ  ᖃᐅᔨᒪᓯᒪᖕᖏᑕᒃᑲᓂᒃ ᑕᑯᒋᐊᓪᓚᓇᕐᑐᓚᕆᐅᕗᑦ.

- ᐃᓖᓇ ᓇᓴᒃ, ᑲᖏᕐᓱᔪᐊᖅ

ᓄᓇᕕᒃ ᓯᕗᓂᑦᓴᕗᑦ ᐅᕙᓐᓂᒃ ᐃᓗᕐᕈᓯᕐᓅᕙᖓ ᐃᓄᒃᑎᑑᑦᓯᐊᒪᕆᓐᓂᕋᓄᓗ ᐱᑐᒋᐊᓪᓚᒍᑎᓄᑦ ᐃᑲᔪᕐᓯᓚᐅᔪᕗᖅ.  ᐆᒃᑐᓚᐅᕆᑦ - ᐱᒋᐊᕈᑎᖏᓐᓄᑦ ᐅᑭᐅᕆᓗᐊᓚᐅᕐᓯᒪᓂᐊᖕᖏᓚᑎᑦ!

- ᕕᑭ ᕈᓯᐊᓪ, ᑰᒃᔪᐊᕌᐱᒃ

ᖃᐅᔨᒪᓚᐅᔪᒐᒪ ᑕᒪᐅᖕᖓᕈᒪᓂᕋᓂᒃ, ᑌᒣᑦᓱᖓ ᓄᓇᕕᒃ ᓯᕗᓂᑦᓴᕗᒻᒧᑦ ᐊᔪᐃᓐᓇᓂᓕᒫᒃᑲᓂᒃ ᐊᑐᕐᑎᓯᓚᐅᔪᕗᖓ.  ᑐᑭᑖᕐᑕᕕᓂᕋ ᐱᐅᒋᓪᓚᕆᑦᓯᐊᑕᕋ!   ᑭᖑᓂᕐᒥ ᐃᕐᖃᓇᕐᑐᖁᑏᑦ ᑕᒪᒃᑯᓂᖓᓗ ᒪᓕᑦᑐᑦ ᐱᓂᐊᕐᓂᓕᕆᓂᕐᒨᓕᖓᔪᑦ ᐃᓕᓐᓂᐊᕆᐊᖏᑦ ᖁᕕᐊᓇᕐᑐᓚᕆᐅᖃᑦᑕᑐᖅ.

- ᑐᑫ ᐊᐅᒋᐊᖅ, ᑰᒃᔪᐊᖅ

ᑖᓐᓇ ᐃᓕᓐᓂᐊᒐᖅ ᐃᓕᓐᓂᐊᕕᒻᒧᑦ ᐳᕐᑐᓂᕐᓴᒋᐊᓪᓚᒧᑦ ᐅᐸᓗᙰᔭᕐᓂᒧᑦ ᐃᑲᔪᕐᓯᓚᐅᔪᕗᖅ.  ᐊᓯᒃᑲᓄᑦ ᐅᓐᓂᑑᑎᒋᔭᕋ.  ᐃᓕᓐᓅᓕᖓᔪᓂᒃ ᐃᓕᑦᓯᒋᐊᓪᓚᓂᐊᕐᑐᑎᑦ ᓱᓇᓱᐊᕈᓐᓇᕆᐊᕐᐱᓗ ᐅᖓᑖᓄᒋᐊᓪᓚᒃ ᑐᑭᓯᓗᑎᑦ.

- ᐄᕙ ᐸᐹᒃ ᐊᕐᓇᑐᖅ, ᖁᐊᕐᑕᖅ

ᑖᓐᓇ ᐃᓕᓐᓂᐊᓂᖅ ᐊᓯᑦᔨᑕᐅᒍᑎᒋᒻᒪᕆᑦᑕᕋ ᑕᑯᓐᓇᕈᓯᒃᑯᑦ ᓱᓇᓕᒫᓂᒃ. ᓄᓇᕕᒻᒧᑦ ᑕᒪᓐᓇ ᑭᖕᖒᒪᒋᔭᐅᓪᓚᕆᑦᑐᖅ, ᓄᓇᕕᒻᒧᓗ ᑕᒪᓐᓇ ᐱᔪᒪᔭᐅᒻᒪᕆᓕᕐᓱᓂ.

- ᒥᐊᔨ ᓵᓐᑕ, ᑰᑦᔪᐊᖅ