1) 603-101-CL: ᖃᓪᓗᓈᑎᑐᑦ – ᐅᑭᐅᕐᑕᑐᒥᐅᓕᒫᑦ ᐊᓪᓚᓯᒪᔪᖁᑎᖏᑦ (60 ᐃᑲᐅᕐᓃᑦ)

ᐊᒥᓲᓕᕙᓪᓕᐊᕗᑦ ᐃᓄᐃᑦ ᐊᓪᓚᖁᑎᑦᓴᓕᐊᕆᓲᖏᑦ ᐊᓪᓚᑕᐅᖃᑦᑕᓯᒪᔪᑦ ᐃᓄᓐᓄᑦ ᖃᓪᓗᓈᕐᑎᑐᑦ, ᐃᓄᑦᑎᑑᕐᑐᐃᓘᓐᓃᑦ ᖃᓪᓗᓈᕐᑎᑑᓕᕐᑎᑕᐅᓯᒪᔪᑦ. ᑕᕝᕙᓂ ᐃᓕᓐᓂᐊᓂᕐᒥ, ᐃᓕᓵᑦ ᖃᐅᔨᓴᖃᑦᑕᓚᖓᔪᑦ ᖃᓄᐃᑦᑐᓂᒃ ᐃᓕᓐᓂᐊᑕᖏᑦ ᑐᖕᖓᕕᖃᕐᓂᐊᒪᖔᑕ, ᓯᑯᑦᓴᔦᓪᓗ ᐊᑦᔨᒌᖕᖏᑐᕐᑎᒍᑦ ᐊᓪᓚᑕᐅᓯᒪᔫᒻᒪᑕ ᑎᒥᐅᔪᓄᑦ ᐊᑦᔨᒌᖕᖏᓄᑐᑦ ᐊᓪᓚᑕᐅᓚᐅᕐᑐᕕᓃᑦ ᐃᓄᓐᓄᑦ: ᐅᓂᒃᑳᑐᐊᑦ ᐅᖃᐅᓯᐅᑉ ᐁᑉᐹᓅᕐᖃᑕᐅᓯᒪᔪᑦ, ᐅᓂᒃᑳᑦ ᓀᑦᑑᑏᑦ, ᐊᑐᐊᕋᑦᓴᓕᐊᖕᖑᐊᑐᐃᓐᓇᐅᓯᒪᔪᑦ ᓱᓕᔫᒐᑎᒃ, ᒥᑦᓯᓕᖕᖑᐊᑦ, ᐊᐅᓚᔫᓪᓗ. ᑕᒪᒃᑯᐊ ᐃᓘᓐᓇᓕᒫᑲᓵᑎᒃ ᐊᑐᐊᒉᑦ ᑌᑦᓱᒪᓂᓂᑕᑦᓴᔭᓅᓕᖓᔪᑦ ᑕᕐᕋᒥᐅᑦ ᐅᖄᔪᓪᓗ ᑌᑦᓱᒪᓂ ᐊᑑᑎᕙᓚᐅᕐᑐᕕᓂᕐᓂᒃ: ᑎᑭᑕᐅᒋᐊᖕᖓᓱᑎᒃ, ᑕᕝᕙᓂᑦᓭᓈᕐᑎᑕᐅᒋᐅᕐᓴᓕᕐᓱᑎᒃ ᓄᓇᒥ, ᖃᑭᕙᓪᓕᐊᓕᕐᓱᑎᒃ. ᐃᓕᓵᑦ ᐱᑐᑦᓯᒪᒋᐅᕐᓴᑎᑕᐅᓚᖓᔪᑦ ᐃᓱᒪᒋᓗᒋᑦ ᐃᓕᓴᕐᑕᖏᑦ ᖃᓄᓪᓗᐊᖅ ᓇᓚᐅᑦᓯᖏᒻᒪᖔᑕ ᖃᓄᕐᓗ ᐱᑐᑦᓯᒪᑎᑕᐅᓕᐅᒥᒍᓐᓇᒪᖔᑕ ᐊᑑᑎᕙᓚᐅᕐᑐᕕᓃᑦ ᐱᐅᓯᕕᓂᖏᓐᓄᑦ.

2) 345-101-MQ: ᐃᓅᑦᔪᓰᑦ – ᖃᐅᔨᒪᔭᐅᔪᑦ ᐊᑑᑎᖃᑦᑕᓯᒪᔪᕕᓃᓪᓗ ᓄᓇᕕᒻᒥ: ᑲᑎᕐᓱᑕᐅᓯᒪᕕᖏᑦ ᐊᒻᒪᓗ ᐅᓂᒃᑳᑐᐊᑦ (60 ᐃᑲᐅᕐᓃᑦ)

ᑕᕝᕙᓂ ᐃᓕᓐᓂᐊᓂᕐᒥ, ᐃᓕᓵᑦ ᑭᓪᓕᓯᓂᐊᓚᖓᔪᑦ ᒪᕐᕈᐃᓂᒃ ᓇᓪᓕᐊᒎᕐᓱᑎᒃ ᐃᕐᖃᓇᕐᑐᓂᐊᕐᑏᑦ ᐊᑑᑎᕙᓚᐅᕐᑐᕕᓂᕐᓂᒃ ᐃᓂᓪᓚᑎᕆᓲᒍᒻᒪᖔᑕ: ᐱᑐᖃᕕᓂᕐᓂᐊᑏᑦ ᖃᐅᔨᓴᕐᓂᖓ, ᐅᖄᔭᐅᓯᒪᔪᓪᓗ ᐊᑯᓂᓂᑕᕕᓂᕐᓂᒃ. ᐃᓕᓵᑦ ᑭᓪᓕᓯᓂᐊᓚᖓᔪᑦ ᑲᑎᕐᓱᑕᐅᓯᒪᔪᓂᒃ ᐱᓇᓱᖃᑎᖃᕐᓗᑎᒃ ᐱᑐᖃᕕᓂᕐᓂᐊᑎᖓᓂᒃ ᐊᕙᑕᒃᑯᑦ ᕿᓂᕐᓗᑎᒃ ᓱᓀᑦ ᖃᐅᔨᔭᐅᒍᓐᓇᒪᖔᑕ ᐊᑑᑎᕙᓚᐅᕐᑐᕕᓃᑦ ᑭᓪᓕᓯᓂᐊᓕᕈᑎᒃ ᐊᓪᓚᑕᐅᕐᖄᖃᑦᑕᓚᐅᕐᑐᕕᓃᑦ. ᐊᒻᒪᓗ, ᐃᓄᒻᒪᕆᓐᓂᒃ ᐁᓯᒪᕕᐅᒋᐊᕐᑐᖃᑦᑕᓚᖓᓂᑦᑎᓂᒃ ᐸᕐᓇᓯᒪᒻᒥᔪᒍᑦ ᐃᓕᓵᓂᒃ ᐅᓂᒃᑲᐅᓯᒃᑯᑦ ᐊᑯᓂᓂᑕᕕᓂᕐᓂᒃ ᐅᓂᒃᑳᕆᐊᕐᑐᓯᒪᔪᓂᒃ ᐊᒻᒪᓗ ᐃᓱᒪᒋᒐᓱᐊᖃᑦᑕᓗᒋᑦ ᖃᓄᖅ ᑐᑭᓯᒪᒍᓯᕕᓂᖏᑦ ᑌᑦᓱᒪᓂ ᐅᓂᒃᑳᑕᐅᓯᒪᔪᑦ ᒪᓕᓪᓗᒋᑦ ᑐᑭᖃᕐᑎᒍᓐᓇᒪᖔᑦᑎᒋ ᑭᖑᕚᕇᑎᒎᕐᑎᑕᐅᕙᓚᐅᕐᑐᕕᓃᑦ. ᐃᓕᓵᑦᑕᐅᖅ ᐃᓱᒪᒋᔭᖃᕋᓱᐊᖃᑦᑕᓂᐊᕐᒥᔪᖅ ᑖᒃᑯᐊ ᐊᓪᓚᑕᐅᓯᒪᔪᑦ ᑐᑭᓯᐅᑕᐅᒋᐊᓕᓐᓂᒃ ᓇᓪᓕᐊᓂᒃ ᐱᑕᖃᕐᒪᖔᑕ, ᖃᓄᕐᓗ ᑭᐳᒃᑫᓯᒪᒍᑎᐅᒻᒪᖔᑕ, ᖃᓄᕐᓗ ᐱᑑᑎᖃᑎᒌᑦᑎᓯᒍᑕᐅᓐᓂᒪᖔᑕ, ᐊᒻᒪᓗ ᑐᑭᓪᓚᕆᕕᓂᖏᓐᓄᑦ ᑎᑭᐅᑎᒍᓐᓇᓯᑎᒐᓱᐊᕐᓗᒋᑦ ᖃᓄᖅ ᑐᑭᓯᒪᒍᓯᖅ ᐃᓂᓪᓚᖓᐅᑕᐅᓚᐅᕐᓂᒪᖔᑦ.

3) 614-103-03: ᓄᓇᓕᑐᖃᑦᓴᔦᑦ ᐅᖃᐅᓯᑦᓴᔭᖏᑦ: ᐃᓄᒃᑎᑐᑦ ᐃᓕᑕᕐᓇᐅᓯᖏᓪᓗ (60 ᐃᑲᐅᕐᓃᑦ)

ᐃᓄᕐᑎᑑᕐᑐᒥᒃ ᐅᖃᐅᓯᕐᒥᒃ ᐃᓕᓐᓂᐊᓃᑦ ᐱᒻᒪᕆᐅᓂᕐᐸᐅᑎᑕᐅᕗᑦ ᓄᓇᕕᒃ ᓯᕗᓂᑦᓴᕘᒃᑯᓂ ᐃᓕᓴᕐᑐᓄᑦ ᐃᓕᓐᓂᐊᕕᕐᔪᐊᒥ ᐃᓕᓐᓂᐊᑕᐅᔪᓂ. ᐅᓪᓗᒥᒧᑦ ᑎᑭᑦᓱᒍ ᐱᓇᓱᐊᕐᑕᐅᓂᕐᐸᐅᖃᑦᑕᑐᖅ ᐃᓄᒃᑎᑑᕈᓯᖓ ᓄᓇᕕᒻᒥᐅᑦ ᐅᓂᑦᑎᓯᒐᓱᐊᕈᑕᐅᑦᓱᓂ ᑐᑭᒋᖕᖏᑕᖏᓐᓂᒃ ᐅᖃᐅᓯᖃᕈᑕᐅᓲᒍᓕᕐᒪᑕ ᐅᖃᐅᓰᑦ ᐃᓄᒃᑎᑐᑦ, ᐃᓄᐃᓪᓗ ᐃᕐᖃᓇᕐᑐᖁᑎᓕᕆᔭᐅᕕᖏᑦᑕ ᐱᓂᐊᕐᓂᕆᓯᒪᓕᕐᑕᖏᑦ ᑖᒃᑯᓇᓂ 125-ᓂ ᐊᕐᕌᒎᓯᒪᓕᕐᑐᓂ ᑕᒪᒃᑯᐊ ᑲᑎᕐᓱᑕᐅᓲᖑᓕᕐᑎᓗᒋᑦ ᐃᓄᓐᓅᓕᖓᔪᑦ ᑌᒪᖕᖓᓂᑦ ᐱᕐᕈᓯᕆᖕᖏᑕᒥᓂᑦ ᐃᓛᕐᑐᑕᐅᕙᓪᓕᐊᓯᓚᐅᕐᓯᒪᑎᓪᓗᒍ ᐃᓄᒃᑎᑑᕐᓂᖅ, ᖃᓪᓗᓈᑎᑐᑦ-ᑭᓯᐊᓂ ᐅᖃᐅᓯᖃᖁᔭᐅᖃᑦᑕᓯᒪᓂᑯᖏᓐᓄᑦ ᐃᓕᓴᕐᑐᑦ ᐊᒻᒪᓗ ᐊᓂᕐᕋᒋᑦᓱᒍ ᐃᓕᓴᕐᕕᐅᖃᑦᑕᓯᒪᔪᓂ. ᑐᕌᒐᓱᐊᕐᐸᑕᖓ ᐃᓄᒃᑎᑐᑦ ᐃᓕᓐᓂᐊᑎᑦᓯᓃᑦ ᓄᓇᕕᒃ ᓯᕗᓂᑦᓴᕘᒃᑯᑦ ᐃᓕᓐᓂᐊᑕᐅᑎᑕᖏᓐᓂ ᐃᓄᓐᓂᒃ ᐃᓕᓵᓂᒃ ᐱᓇᓲᑎᑦᓴᑖᕐᑎᓯᒍᓐᓇᓯᒐᓱᐊᓲᖅ ᐅᖃᐅᓯᑦᓴᔭᓪᓚᕆᒻᒥᓂᒃ ᐊᓯᐅᔨᖁᓇᒋᑦ ᑐᖕᖓᕕᓪᓚᕆᒋᓂᐊᕐᓗᒍᓗ ᐃᓅᓯᖅ ᐃᓄᒃ ᐃᓕᒃᑰᑐᖅ ᑲᑐᑦᔨᔪᐃᓪᓘᓃᑦ ᐅᓇᒻᒥᒋᓕᕐᑕᖏᑎᒍᑦ ᐃᑲᔪᕐᓯᒪᖁᓪᓗᒍ ᐃᓕᑕᕐᓯᒪᐅᑕᐅᑦᓯᐊᕈᓐᓇᓯᖁᓗᒍᓗ ᐅᓪᓗᒥᐅᔪᖅ ᐱᐅᓯᐅᓕᕐᑑᒐᓗᐊᑎᒍᑦ ᖁᓱᖕᖏᑐᑦᓯᐊᖑᒍᑎᒋᓗᒍ ᑐᖕᖓᕕᒋᓂᐊᕐᒪᐅᒃ ᐋᑑᑎᓚᐅᕐᑐᕕᓂᕐᓄᑦ ᑌᑦᓱᒪᓂᐊᓗᒃ. ᓯᕗᓕᖃᑕᐅᑦᓯᐊᐸᓐᓂᐊᒪᑕ ᐆᒪᓪᓚᕆᑦᑎᓯᓚᕿᕋᑕᕐᓗᑎᒃ ᐃᓄᒃᑎᑐᑦ ᐅᖃᐅᓯᕐᒥᒃ.

4) 109-101-MQ: ᐃᙯᓕᓴᕐᓂᒥᒃ ᐃᓕᓐᓂᐊᓂᖅ – ᐃᓄᐃᑦ ᐱᖕᖑᐊᕈᓯᖏᑦ (30 ᐃᑲᐅᕐᓃᑦ)

ᐃᓄᐃᑦ ᐱᕐᖁᓯᑐᖃᑦᓴᔭᖏᑎᒍᑦ ᐱᖕᖑᐊᕈᓰᑦ ᐱᓯᑎᑦᓴᔭᐅᒍᑎᐅᒋᐊᖃᓲᖑᒻᒥᔪᑦ ᐊᑑᑎᓪᓗᑐᕐᓗᒋᑦ ᑭᓯᐊᓂᓪᓗᑐᐊᓘᖃᑦᑕᓯᒪᓂᑯᖏᓐᓄᑦ ᐅᓪᓗᖅ ᑕᒫᑦ ᐊᓐᓇᐅᒪᒐᓱᐊᕈᑎᕕᓂᖏᓐᓅᓕᖓᒻᒪᑕ ᐅᑭᐅᕐᑕᑐᒥ. ᐃᓚᖏᑦ ᐱᖕᖑᐊᕈᓰᑦ ᑖᒃᑯᐊ ᐊᑑᑎᔭᐅᖃᑦᑕᓯᒪᕗᑦ ᑕᐅᓴᓐᑏᓂ ᐊᕐᕌᒍᓂ ᑌᒪᖕᖓᓂᑦ, ᐃᓚᖏᓪᓗ ᓴᕐᕿᑎᑕᐅᕐᖃᒥᐅᒐᓗᐊᕐᒥᑎᓪᓗᒋᑦ ᐊᕐᕌᒍᕐᑐᓯᒪᑐᐃᓐᓇᑐᐃᓪᓕ ᖃᓐᑌᓂᒃ ᑭᖑᓪᓕᐹᓂ. ᐊᑑᑎᔭᐅᓲᑦ ᓄᓇᓕᓕᒫᓂ, ᑲᓇᑕᓕᒫᒥ ᐊᓪᓛᑦ ᓯᓚᕐᔪᐊᓕᒫᒨᕈᑕᐅᕙᓕᕐᓱᑎᒃ ᐱᓕᐅᑦᔨᕋᐅᑕᐅᑦᓱᑎᒃ ᐃᓄᐃᑦ ᐱᖕᖑᐊᕈᓯᖏᑦ, ᐆᑦᑑᑎᒋᓗᒋᑦ: ᐊᑑᑎᔭᐅᓲᓂ ᐊᕐᕌᒎᒃ ᒪᕐᕈᒃ ᑕᒫᑦ ᐅᑭᐅᕐᑕᑐᒥᐅᑦ ᐅᑭᐅᒥ ᐱᓕᐅᑦᔨᕋᕐᓂᖓᓂ, ᐊᑕᐅᑦᓯᑰᖃᑕᐅᒻᒥᑎᓪᓗᒋᑦ ᐃᓄᐃᑦ ᐱᖕᖑᐊᕈᓯᖏᑦ ᐱᒋᐅᕐᓴᐅᑎᐅᓯᒪᒋᐊᖃᓲᑦ ᖃᐅᔨᓴᕐᑕᐅᕙᑦᓱᑎᒃ ᐱᓯᑕᐅᒍᓇᐅᒻᒪᖔᑕ ᓲᖑᓂᖏᑦ, ᐃᖃᖕᖏᓂᖏᑦ, ᐃᓱᐊᓅᕈᓐᓇᓯᐊᕐᓂᖏᓪᓗ. ᑕᕝᕙᓂᓗ ᐃᓕᓐᓂᐊᓂᕐᒥ, ᑐᑭᓯᒪᒋᐊᓖᑦ ᑎᒥᒥᓂᒃ ᑲᒪᑦᓯᐊᕆᐊᖃᕐᓂᒥᒃ ᐅᐃᕆᓯᒪᑦᓯᐊᓗᒍ ᑕᒪᓐᓇ ᑲᒪᔪᑑᓪᓚᕆᐅᓲᖑᒻᒪᑦ ᐱᒋᐊᕋᓱᐊᓕᑐᐊᕐᒪᑕ ᐊᕐᕌᒎᑉ ᐱᒋᐊᕐᓂᖓᓂ ᐃᓕᓵᑦ ᐊᔪᕆᒐᓱᐊᕐᓱᑎᓪᓘᓲᒍᓂᑯᖓᓄᑦ ᓇᔪᓚᖓᔭᒥᑕ ᓄᓇᖓᓂᒃ ᓯᓚᖓᓂᓗ ᐃᓪᓗᒐᓱᐊᕐᔪᐊᓂᒥᐅᖑᒐᓱᐊᓕᕋᒥᒃ ᐊᒻᒪᓗ ᐊᒥᓱᓪᓚᕆᐊᓗᑦᑎᒍᑦ ᐃᓅᓯᖓᑕ ᐊᑑᑎᒍᓐᓇᓂᖓ ᐊᑦᔨᒌᖕᖏᑐᓚᑳᓂᒃ ᐱᐅᓯᕐᓂᒃ ᒪᓂᒪᕕᒋᓂᐊᕐᑕᖏᓐᓂᒃ.

5) 360-NSP-AB: ᐃᓕᓴᕐᑕᐅᒋᐊᓪᓛᓃᑦ ᐊᓯᖏᑦ – ᐃᓗᕐᕈᓯᒥᓂᒃ ᓄᐃᑕᑎᑦᓯᓂᖏᑦ ᓄᓇᕕᒻᒥᐅᓄᑦ (45 ᐃᑲᐅᕐᓃᑦ)

ᐃᓕᓵᑦ ᑲᑎᒪᓂᐊᕈᓯᕐᓂ ᐃᓚᐅᕕᖃᖃᑦᑕᓂᐊᕐᒥᔪᑦ ᐊᑕᐅᑦᓯᑰᕐᑎᑕᐅᔪᓂ ᐃᓄᓐᓄᑦ ᑕᑯᓐᓇᐅᔮᕐᑕᐅᑎᑦᓯᔨᓄᑦ ᐱᖕᖑᐊᑕᒥᓂᒃ ᐃᖕᖏᑎᓄᓗ, ᐊᒻᒪᓗ ᐃᒻᒥᓂᒃ ᓴᕐᕿᑎᑕᒥᒍᑦ ᑕᑯᓐᓇᐅᔮᕐᑎᓯᒍᑎᑦᓴᒥᓂᒃ ᓴᓇᖃᑦᑕᒥᓗᑎᒃ. ᑕᒪᓐᓇ ᐆᑦᑐᕋᕐᑕᐅᑐᐃᓐᓇᓂᕐᒦᓂᑯᖓᓄᑦ ᐃᓕᓐᓂᐊᓂᖅ, ᐃᓕᓐᓂᐊᖏᓐᓂᓴᐅᓗᑎᒃ ᐱᒋᐅᕐᓴᕙᓪᓗᖃᑦᑕᑐᐃᓐᓇᓚᖓᔪᓪᓕ ᐱᕐᕈᓯᑐᖃᑦᓴᔭᕐᑎᒍᑦ ᑖᓂᓯᕐᓂᓂᒃ, ᑐᓴᕐᓂᔮᕐᑎᓯᓂᕐᒥᒃ, ᐱᖕᖑᐊᓂᕐᓂᒃ, ᑕᒪᒃᑯᓂᖓᓗ ᐊᓯᖏᓐᓂᒃ ᐃᓄᓐᓄᑦ ᐊᒥᓱᓂᒃ ᑕᑯᓐᓇᐅᔮᕐᑎᓯᒍᑕᐅᒍᓐᓇᑐᓂᒃ. ᐅᓇᒻᒥᒋᓗᒍ, ᑐᕌᒐᓱᐊᖃᑦᑕᓚᖓᔪᖅ ᑖᑦᓱᒪ ᐃᓕᓐᓂᐊᑕᐅᓂᖓ ᖁᕕᐊᓱᖃᑎᒌᑦᑎᓯᒍᑕᐅᒐᓱᐊᕐᓂᒧᑦ ᖁᓱᖕᒉᓐᓂᖓᑕ ᐃᓗᕐᕈᓯᑦᓴᔭᖓ ᓄᓇᕕᒻᒥᐅᑦ ᐃᓄᐃᑦ, ᐃᓕᓵᓂᒃ ᐱᕕᑦᓴᑖᕐᑎᓯᒍᑕᐅᒐᓱᐊᕐᓗᓂ ᓴᕐᕿᑎᑦᓯᕙᓪᓕᐊᕈᓐᓇᓂᕐᒧᑦ ᐃᓗᕐᖁᓯᑦᓴᔭᒥᑎᒍᑦ ᓇᓗᕐᖁᑎᖕᖑᐊᕈᓐᓀᓗᑎᒃ ᐃᒻᒥᓂᓗ ᐃᓅᓯᕐᒥᑎᒍᑦ ᐱᕙᓪᓕᐊᕈᑕᐅᒍᓐᓇᓯᖁᓪᓗᒍ.

1) 603-102-MQ: ᖃᓪᓗᓈᑎᑐᑦ – ᐅᓪᓗᒥᐅᔪᖅ ᑎᑭᑦᓱᒍ ᐅᑭᐅᕐᑕᑐᓕᒫᒥ ᐃᓱᒫᓘᑕᐅᔪᑦ (60 ᐃᑲᐅᕐᓃᑦ)

ᑕᕝᕙᓂ ᐃᓕᓐᓂᐊᓂᕐᒥ, ᐃᓕᓵᑦ ᓴᕐᕿᑎᑦᓯᕕᐅᓚᖓᔪᑦ ᐊᒥᓱᐃᓄᑦ ᐊᑦᔨᒌᖕᖏᑑᑦᓱᑎᒃ ᑕᑯᓐᓇᐅᔮᕐᑕᐅᑎᒐᑦᓴᓂᒃ ᓱᓕᔪᓪᓚᕆᕕᓂᐅᑦᓱᑎᒃ ᐊᓪᓚᖑᕐᑎᑕᐅᓯᒪᔪᓂᒃ ᖃᓪᓗᓈᕐᑎᑑᕐᑐᓂᒃ (ᐊᑑᑎᔭᕕᓃᑦ ᐅᓂᒃᑳᖏᓐᓂᒃ, ᐊᑐᐊᒐᕐᓂᒃ, ᑐᓴᕋᑦᓴᓂᒃ, ᐊᓯᖏᓐᓂᓗ). ᐃᓗᓕᖏᑦ ᑖᒃᑯᐊ ᐃᓕᓐᓂᐊᕋᑦᓭᑦ ᐃᓱᒫᓘᑕᐅᓯᒪᔪᓂᒃ ᒪᓂᔨᒍᑕᐅᔪᑦ ᐱᒻᒪᕆᓐᓂᒃ ᐊᑦᔨᒌᖕᖏᑐᕐᑎᒍᑦ ᐊᑑᑎᔭᐅᖃᑦᑕᓯᒪᔪᓂᒃ ᓄᓇᕕᒻᒥ ᐅᑭᐅᕐᑕᑐᓕᒫᒥᓪᓗ. ᐃᓕᓵᑦ ᐃᓕᓐᓂᐊᓚᖓᔪᑦ ᖃᓄᖅ ᑕᒪᒃᑯᐊ ᓱᑯᐃᔭᕐᑕᐅᓲᑦᓴᔭᐅᒻᒪᖔᑕ ᓴᕐᕿᑎᑦᓯᒍᓐᓇᓯᕋᑕᕐᓗᑎᒃ ᓱᓕᓪᓚᕆᑦᑑᓯᒪᑎᓪᓗᒋᑦ ᓯᑯᑦᓴᔭᖕᖑᑎᑦᓯᓂᕐᒥᒃ.

2) 345-102-MQ: ᓯᓚᕐᔪᐊᒥ ᑐᓴᕋᑦᓭᑦ – ᐱᔪᓐᓇᐅᑏᑦ, ᐃᒻᒥᓂᒃ ᒪᑭᒋᐅᕐᓴᓃᑦ, ᐊᒻᒪᓗ ᔦᒥᓯ ᐯ ᑯᐯᒃ ᑕᕐᕋᖓᑕᓗ ᐊᖏᖃᑎᒌᓐᓂᖓ (60 ᐃᑲᐅᕐᓃᑦ)

ᔦᒥᓯ ᐯᒃ ᑯᐯᒃ ᑕᕐᕋᖓᑕᓗ ᐊᖏᖃᑎᓃᓐᓂᖓ (JBNQA) ᐊᐅᓚᑦᓯᕗᖅ ᐅᓪᓗᒥᐅᔪᖅ ᓄᓇᕕᒻᒥᒃ. ᐊᑎᓕᐅᕈᑕᐅᓚᐅᕐᓯᒪᑦᓱᓂ 1975-ᒥ ᐃᓄᓐᓄᑦ, ᐊᓪᓚᓄᓪᓗ ᑯᐯᒃ ᑕᕐᕋᖓᓂᒥᐅᓄᑦ, ᑯᐯᒃᑯᑦ ᑲᕙᒪᖓᓄᑦ, ᑲᕙᒪᑐᖃᒃᑯᓄᓗ. ᐊᒻᒪᓗᒋᐊᓪᓚᒃ, ᐃᓄᖃᓚᐅᕐᓯᒪᒻᒥᔪᖅ ᑯᐯᒃ ᑕᕐᕋᖓᓂᒥᐅᓂᒃ, ᐊᖏᖃᑕᐅᖕᖏᑐᓂᒃ ᐊᑎᓕᐅᖃᑎᒌᒍᑕᐅᓂᖓᓂᒃ ᑲᔪᓯᑎᑕᐅᓯᓂᖓᓂᓗ ᑖᑦᓱᒪ ᐊᖏᖃᑎᒌᓐᓂᐅᑉ. ᐹᕐᓯᖓᖃᑎᒌᒍᑕᐅᓂᖓ ᑕᒪᑐᒪᓕᒫᑉ ᐊᑦᔨᒌᖕᖏᑐᕐᑎᒍᑦ ᓯᓚᕐᔪᐊᒥᐅᑎᒍᑦ ᐃᓱᒪᖃᕈᑕᐅᓂᖓ 1970 ᐊᕐᕌᒍᖏᓐᓂ ᐊᒻᒪᓗ 1980 ᐊᕐᕌᒍᖏᓐᓂ ᐃᓅᑦᔪᓯᖃᕈᑕᐅᓯᒪᕗᖅ ᐊᐅᓚᔮᕐᑐᒪᕆᐊᓘᒍᑕᐅᓯᒪᕗᖅ ᓄᓇᕕᒻᐅᑦ ᐊᑑᑎᓯᒪᔭᖓᓂᐅᒃ ᐊᕐᕌᒎᓯᒪᔪᓂ ᑭᖑᓪᓕᐹᓂ. ᑌᒪᖕᖓᓂᓪᓗ, ᐃᓄᐃᑦ ᓄᓇᕕᒻᒥᐅᑦ ᐱᖕᖓᑕᕋᓱᐊᖏᓐᓇᐳᑦ ᐃᒻᒥᓂᒃ-ᒪᑭᑕᕆᐅᕐᓴᕋᓱᐊᕐᓱᑎᒃ. ᑕᕝᕙᓂ ᐃᓕᓐᓂᐊᓂᕐᒥ, ᐃᓕᓵᑦ ᑭᓪᓕᓯᓂᐊᓚᖓᕗᑦ ᐊᑐᓂᑦ ᑕᒪᒃᑯᐊ ᓯᓚᕐᔪᐊᒥᐅᓄᑦ ᑐᑭᓯᒪᔭᐅᓂᕆᖃᑦᑕᓚᐅᔪᔭᖏᑦ ᖃᓄᐃᓕᖓᓐᓂᒪᖔᑕ ᑐᓴᐅᒪᔭᐅᒍᑎᕕᓂᖏᑦ ᐊᑎᓕᐅᕐᓂᐅᑉ JBNQA-ᒥᒃ, ᑲᔪᓯᒋᐊᕐᑎᑕᐅᓯᓂᕕᓂᖓᓂᒃ ᐊᒻᒪᓗ ᐃᓄᐃᑦ ᐱᒡᒐᑕᕋᓱᐊᕐᑐᐹᓘᓯᒪᓂᖏᓐᓂᒃ ᐱᔪᓐᓇᐅᑎᑖᖃᓱᐊᕐᓱᑎᒃ ᐃᒻᒥᓂᕿᒍᓐᓇᐅᑎᒋᓂᐊᕐᑕᒥᓂᒃ ᑖᒃᑯᓇᓂ ᐊᕐᕌᒍᓂ ᑭᖑᓪᓕᐹᖏᓐᓂ 50-ᐃᑦ ᐃᓗᐊᓂ..

3) 614-203-03: ᓄᓇᓕᑐᖃᑦᓴᔦᑦ ᐅᖃᐅᓯᑦᓴᔭᖏᑦ – ᐃᓄᒃᑎᑐᑦ ᐊᒻᒪᓗ ᐅᓪᓗᒥᐅᔪᖅ ᐱᐅᓯᑎᒍᑦ (60 ᐃᑲᐅᕐᓃᑦ)

ᑕᑯᓐᓇᖑᐊᕈᑎᒋᕙᕗᑦ ᑖᓐᓇ ᐃᓕᓐᓂᐊᓂᖓ ᐃᓕᓵᑦ ᓴᕐᕿᑎᑦᓯᒍᑕᐅᒐᔭᕆᐊᖓ ᒪᕐᕈᐃᓂᒃ ᐱᒻᒪᕇᓐᓂᒃ ᐊᐱᕐᖁᑎᑖᓚᕿᐅᑎᒋᒐᔭᕐᑕᖓᓂ: “ᑭᓇᐅᕗᖔ (ᓇᒻᒥᓂᖅ ᐃᓅᓯᒃᑯᑦ) ᐅᓪᓗᒥᐅᔪᖅ ᐱᐅᓯᐅᓕᕐᑐᖅ ᐊᑐᕐᓱᒍ?” ᐊᒻᒪᓗ “ᑭᓇᒃᑰᕕᑖᑦ (ᐃᓄᑦᑎᒍᑦ) ᐅᓪᓗᒥᐅᔪᖅ ᐱᐅᓯᐅᓕᕐᑐᖅ ᐊᑐᕐᓱᒍ?” ᑖᒃᑯᐊ ᐊᐱᕐᖁᑏᒃ ᒪᕐᕈᐃᒃ ᑐᑭᓕᐊᕐᓯᐅᑎᒋᓚᖓᔭᖏᓐᓂ ᑐᖕᖓᕕᓪᓚᕆᒋᔭᐅᓂᐊᕐᑑᒃ ᐃᓕᓵᑦ ᕿᒥᕐᕈᓕᕐᐸᑕ ᐅᓪᓗᒥᐅᔪᖅ ᐊᑑᑎᔭᐅᓕᕐᑐᓂᒃ ᓱᕐᕃᒍᑕᐅᖃᑦᑕᓱᑎᒃ ᐃᓗᕐᕈᓯᑦᓴᔭᖓᓂᒃ ᐊᒻᒪᓗ ᐊᑐᕐᓗᒍ ᖃᓄᐃᓕᒋᐊᑦᓯᐊᕈᑕᐅᒍᓐᓇᓂᖓᓂᒃ ᑲᑐᑦᔨᓗᑎᒃ ᐃᓗᕐᕈᓯᑦᓴᔭᒥᓂᒃ ᐊᑐᕐᓗᑎᒃ ᓴᕐᕿᑎᑦᓯᒍᑕᐅᒍᓐᓇᓂᖓ ᐅᓪᓗᒥᐅᔪᖅ ᐱᐅᓯᐅᓕᕐᑐᓂ. ᑌᒣᒻᒪᓗ ᑖᓐᓇ ᓇᓪᓕᐊᓃᓐᓂᕆᓕᕐᑕᑎᓐᓂᒃ ᐅᓪᓗᒥᐅᔪᖅ ᐃᓕᓐᓂᐊᑕᐅᔪᖅ, ᑕᑯᓐᓇᓗᐊᖕᖏᓂᕐᓴᐅᒍᑕᐅᑦᓱᓂ ᓯᕗᓂᑦᓴᒦᑦᑐᓂᒃ.

4) 109-102-MQ: ᐃᙯᓕᓴᕐᓂᒥᒃ ᐃᓕᓐᓂᐊᓂᖅ – ᐱᕐᕈᓯᑐᓴᑦᓴᔭᕐᑎᒍᑦ ᐱᔪᓐᓇᐅᓰᑦ (30 ᐃᑲᐅᕐᓃᑦ)

ᑖᓐᓇ ᐃᓕᓐᓂᐊᓂᖅ ᐊᐅᓚᑕᐅᓚᖓᔪᖅ ᐊᑦᔨᐸᓱᖓᑎᑐᑦ ᔮᓐ ᐋᐸᑦᒥ ᐃᓕᓐᓂᐊᑕᐅᓲᑦ ᓯᓚᒦᑦᑐᓄᑦ ᐃᓕᓐᓂᐊᓂᐅᓗᓂ (ᐃᙯᓕᓴᕐᓂᖅ) ᐅᐊᕈᑦᓯᖃᑦᑕᓗᒍ ᐸᕐᓇᕈᓯᕐᓂᒃ ᒪᙯᓐᓂᓴᒧᑦ ᐊᑐᐃᓐᓇᕈᕐᑎᓂᕐᒧᓗ, ᐱᓇᓲᑎᑐᖃᐅᓚᐅᕐᑐᕕᓂᕐᓂᒃ ᐱᓇᓲᑎᓂᒃ ᐊᑐᕐᓱᓂ ᐊᑐᕐᑕᐅᒍᓯᕕᓂᖏᓐᓂᓗ ᐆᑦᑑᑎᒋᒋᑦ, ᓴᓇᓂᕐᓂᒃ ᐅᓪᓗᒥᐅᔪᖅ, ᑌᑦᓱᒪᓂᓂᑕᕐᓂᓗ ᓯᓂᑦᑕᕋᕐᕕᓴᓂᒃ. ᒪᙯᓐᓂᐅᓛᕐᑐᖅ ᐊᑑᑎᓚᕐᑐᖅ ᐃᓇᓱᐊᕈᓯᕐᑐᓗᓂ ᐃᓕᓐᓂᐊᑕᐅᓪᓚᕆᓪᓗᓂ ᓄᓇᒥᓪᓗᑎᒃ ᓄᓇᕕᒻᒥ ᓄᓇᓖᑦ ᓴᓂᐊᓂ. ᑖᓐᓇ ᐃᓕᓐᓂᐊᓂᖅ ᐃᑲᔪᕐᓯᒪᓚᖓᔪᖅ ᐃᓕᓵᓂᒃ ᐃᓗᕐᕈᓯᑦᓴᔭᒥᓂᒃ ᑯᑯᔭᕈᓐᓀᓕᕐᑎᓯᒐᓱᐊᕈᑕᐅᓗᓂ ᐊᑑᑎᓪᓚᕆᖃᑦᑕᓕᑐᐊᕈᑎᒃ ᓴᕐᕿᑎᑦᓯᓚᕆᓪᓗᑎᒃ ᐱᐅᓯᑦᓴᔭᕕᓂᕐᒥᒃ ᐃᓕᑕᕆᔭᐅᓪᓗᐊᓲᒍᖕᖏᑐᒥᒃ ᐃᓕᓐᓂᐊᕕᑐᐃᓐᓇᓂ, ᐱᕐᕈᓯᑦᓴᔭᓪᓗᑐᕐᒥᒍᓪᓗ ᐊᓐᓇᐅᒪᒍᓐᓇᓂᕐᒥᓂᒃ ᑐᑭᓯᑎᑕᐅᓗᒍᑎᒋᓗᓂᐅᒃ ᑌᒪᖕᖓᓕᒫᖅ ᑕᒪᓐᓇ ᐊᑑᑎᒋᐊᖃᓚᐅᕐᓯᒪᒍᓐᓀᕋᓗᐊᕐᓱᓂᐅᒃ.

5) 360-CEN-AB: ᐃᓗᕐᕈᓯᑦᓴᔭᒥᓂᒃ ᓴᕐᕿᔮᕐᑎᓯᓂᖅ ᓄᓇᕕᒻᒥᐅᓄᑦ (45 ᐃᑲᐅᕐᓃᑦ)

ᑕᕝᕙᓂ ᐃᓕᓐᓂᐊᓂᕐᒥ, ᐃᓕᓵᑦ ᑕᑯᒋᐅᕐᑎᑕᐅᓚᖓᔪᑦ ᐊᑦᔨᒌᖕᖏᑐᕐᑎᒍᑦ ᐃᓄᐃᑦ ᐃᓗᕐᕈᓯᑦᓴᔭᖓᑕ ᐱᐅᓯᑦᓴᔭᖓᓂᒃ, ᑕᑯᓐᓇᓗᐊᖕᖑᐊᑎᑕᐅᓗᑎᒃ ᑕᑯᓐᓇᑕᐅᒍᓐᓇᑐᓕᕆᓗᑎᒃ ᑕᑯᓐᓇᐅᔮᕐᑎᓯᒍᑎᒋᓗᒋᓪᓗ. ᐳᓛᕆᐊᖃᑦᑕᓗᑎᒃ ᑕᑯᓐᓇᑎᑦᓯᕕᓐᓄᑦ, ᓴᕐᕿᔮᕐᑎᓯᔪᓂᒃ ᑕᑯᓐᓇᕆᐊᕐᑐᖃᑦᑕᓗᑎᒃ, ᐊᕙᑕᒃᑯᑦ ᑲᑎᕐᓱᐃᒪᕕᖓᓄᑦ ᐁᓯᒪᖃᑦᑕᓗᑎᒃ, ᐃᓚᐅᖃᑦᑕᓗᑎᓗ ᐃᓗᕐᕈᓯᑦᓴᔭᒨᓕᖓᔪᓂᒃ ᑲᑎᒪᓂᐊᕈᓯᖃᕐᑎᓯᔪᓂ. ᐃᓕᓐᓂᐊᓇᖅ ᑖᓐᓇ ᖃᕝᕙᑎᑦᓯᒋᐊᕈᑕᐅᒐᓱᐊᓚᖓᔪᖅ ᐃᓗᕐᕈᓯᕐᒥᑎᒎᕐᑐᓂᒃ ᓇᓗᕐᖁᑎᒍᑎᖃᕈᓐᓀᒋᐅᕐᓴᓂᕐᒥᒃ ᐃᓕᓵᓂᒃ. ᑕᕝᕙᓂ ᐃᓕᓐᓂᐊᓂᕐᒥ, ᐃᓕᓵᑦ ᐃᓚᐅᕕᖃᖃᑦᑕᓂᐊᕐᒥᔪᑦ ᐃᓗᕐᕈᓯᐅᑉ ᑲᑎᒪᓂᐊᕈᓯᖃᕈᑕᐅᓂᖏᓐᓂᒃ ᐃᓕᑦᓯᕕᒋᖃᑦᑕᓂᐊᕐᓱᓂᐅᒃ ᐃᓚᖏᓐᓂᒃ ᐱᕐᕈᓯᑦᓴᔭᑐᖃᕕᓂᕐᓂᒃ ᑕᑯᓐᓇᐅᔮᕐᑕᐅᒍᓯᕐᓂᒃ ᐊᒻᒪᓗ ᑕᑯᔭᑦᓴᓂᒃ ᐃᓇᖁᓇᕐᑐᖑᐊᓂᒃ. ᐊᓱᐃᓛᓪᓗ ᑕᒪᒃᑯᐊ ᐱᔪᓐᓇᐅᓯᕐᑖᖏᑦ ᓴᕐᕿᔮᕐᑎᑕᐅᓯᖃᑦᑕᓗᑎᒃ ᒪᓂᔨᒍᑎᒋᓗᒋᑦ ᐃᓕᓴᕐᕕᓂ, ᑲᕙᒪᓂ, ᑎᒥᐅᔪᓂ ᐱᓇᓱᐊᕐᑐᓂ ᓄᓇᕕᒻᒥ, ᐊᒻᒪᓗ ᐃᓄᓕᒫᓂᒃ ᑕᑯᓐᓇᑎᑦᓯᒍᑕᐅᓗᑎᒃ.