ᒥᑦᓵᓄᑦ

ᐊᑦᔨᐅᖏᑦᑐᖅ ᑯᐯᒃᒥ, ᓄᓇᕕᒃ ᓯᕗᓂᑦᓴᕗᑦ ᐊᑐᐃᓐᓇᐅᑎᑦᓯᓲᑦ ᐊᑕᐅᓯᕐᒥᒃ ᐊᕐᕌᒍᕐᒥ ᐃᓕᓐᓂᐊᑎᑦᓯᓂᕐᒥᒃ ᐃᓄᐃᑦ ᒥᑦᓵᓄᑦ ᐊᒻᒪᓗ ᓯᓚᕐᔪᐊᒥ ᐅᑭᐅᕐᑕᑐᒥᐅᑉ ᐱᓂᐊᕐᓂᕆᖃᑦᑕᓯᒪᔭᖏᓐᓂᒃ, ᐱᓂᐊᕐᓂᓕᕆᓂᕐᓂᒃ, ᐊᐅᓚᑦᓯᓂᕐᒥᒃ, ᐃᓗᕐᕐᑯᓯᕐᒥᒃ ᐅᖃᐅᓯᕐᒥᓗ. ᐃᓕᓐᓂᐊᑏᑦ ᕿᒥᕐᕈᓂᖃᓲᑦ ᓯᓚᕐᔪᐊᒥ ᐱᓂᐊᕐᓂᖃᕈᑕᐅᔪᓂᒃ ᐃᓄᐃᑦ ᐃᓱᒪᒍᓯᖓᓂᒃ ᐊᑐᕐᓱᑎᑦ. ᐃᓕᓐᓂᐊᓂᕐᒥᓂᒃ, ᐱᓂᖃᓲᑦ ᐱᒻᒪᕆᕋᑕᕐᓂᒃ ᐃᓱᒪᒍᓐᓇᓯᓂᕐᒥᒃ ᓄᓇᕕᐅᑉ ᒥᑦᓵᓄᑦ, ᐃᓄᖏᓐᓂᒃ ᐃᓕᕐᕐᑯᓯᖏᓐᓂᓗ.

ᓄᓇᕕᒃ ᓯᕗᓂᑦᓴᕗᑦ, ᐃᓕᓐᓂᐊᑏᑦ;
ᕿᒥᕐᕈᓂᖃᓲᑦ ᐃᓄᐃᑦ ᑭᓇᐅᓂᖏᓐᓂᒃ, ᐊᒻᒪᓗ ᐱᑐᑦᓯᒪᓂᖏᓐᓂᒃ ᓄᓇᕕᐅᑉ ᓄᓇᓕᖏᓐᓄᑦ ᐊᒻᒪᓗ ᐃᓘᓐᓈᒍᑦ ᐱᓂᐊᕐᓂᕆᖃᑦᑕᓯᒪᔭᖏᓐᓂᒃ;
ᐱᒍᓐᓇᑐᑦ ᐃᓕᓐᓂᐊᕕᒻᒥ ᐳᕐᑐᓂᕐᓴᒋᐊᓪᓚᒥ ᖁᕝᕙᕆᐊᕈᑎᓂᒃ ᐱᔭᕇᒍᓐᓇᐅᑎᑖᕋᓱᐊᕐᓂᒥᓄᑦ ᓯᕗᓂᕐᒥ;
ᐱᕕᑦᓴᖃᕐᓂᖅ ᖃᓪᓗᓈᓂᒥᐅᖑᓂᕐᒥᒃ ᐱᐅᔪᑎᒍᑦ ᐊᑑᑎᓯᒪᓂᕐᒥᒃ ᒪᓐᑐᔨᐊᒥ;
ᐱᕙᓪᓕᐊᑎᑦᓯᓂᖅ ᐱᓇᓱᕝᕕᒥ ᐱᒍᓐᓇᓂᕐᒥᓂᒃ ᓄᓇᕕᒻᒥᑦ ᐱᓇᓱᑦᑎᓯᔩᑦ ᕿᓂᕐᑕᖏᓐᓂᒃ;
ᓲᖑᓯᑎᒋᐊᕐᓗᒋᑦ ᐃᑉᐱᒋᔭᖏᑦ ᑭᓇᐅᓂᕐᒥᓂᒃ ᓯᕗᓕᕐᑎᐅᒍᓐᓇᓂᕐᒥᓂᓪᓗ.

ᐱᓇᓱᖃᑎᒌᑦ

ᓄᓇᕕᒃ ᓯᕗᓂᑦᓴᕗᑦ ᐱᕚᓪᓕᓲᖑᕗᖅ ᐃᑲᔪᕐᓯᔭᐅᓯᒪᓂᒃᑯᑦ ᐱᓇᓱᖃᑎᒋᔭᕐᒥᓄᑦ. 2015-ᖑᑎᓪᓗᒍ, ᓯᑕᒣᑦ ᓄᓇᓕᓕᒫᓂᒃ ᑎᒥᐅᔫᔪᑦ ᓄᓇᕕᒻᒥ ᐅᐯᔪᕕᓃᑦ ᔮᓐ ᐋᐸᑦ ᐃᓕᓐᓂᐊᕕᒻᒪᕆᖓᓂᒃ ᐃᑲᔪᕐᑕᐅᒍᒪᑦᓱᑎᑦ ᐋᕐᕐᑭᓱᐃᓂᕐᒥᒃ ᑐᓂᓯᓂᕐᒥᓗ ᐃᓕᕐᕐᑯᓯᕐᒨᓕᖓᔪᓂᒃ ᐊᑑᑎᖃᕐᑐᓂᒃ ᐃᓕᓐᓂᐊᑎᑦᓯᒍᑎᑦᓴᓂᒃ ᐅᕕᒃᑲᓄᑦ ᓄᓇᕕᒻᒥᐅᓄᑦ. ᐊᑕᐅᑦᓯᑯᑦ, ᓄᐃᑦᓯᔪᕕᓃᑦ ᖃᓄᐃᓘᒋᐊᖁᔨᔩᑦ ᑲᑎᒪᔨᖏᓐᓂᒃ, ᓯᕗᓕᕐᑐᖅ ᑲᒪᒋᔭᖃᕐᓱᓂᓗ ᓄᓇᕕᒃ ᓯᕗᓂᑦᓴᕗᑦ ᐱᕙᓪᓕᐊᓂᕆᔭᖓᓂᒃ. ᖃᕐᔪᐃᑦ ᐅᕕᒃᑫᑦ ᑲᑎᒪᔨᖏᑦ ᐃᓚᐅᓯᒪᓂᖃᓕᓚᐅᕐᒥᔪᖅ ᖃᓄᐃᓘᒋᐊᖁᔨᔩᑦ ᑲᑎᒪᔨᖏᓐᓄᑦ.

ᔮᓐ ᐋᐸᑦ ᐃᓕᓐᓂᐊᕕᒻᒪᕆᖓ ᐳᕐᑐᓂᕐᓴᒋᐊᓪᓚᒥᒃ ᐱᔭᕇᕈᑎᓂᒃ ᑐᓂᓯᔨᐅᖃᑎᒋᔭᕗᑦ, ᐃᓕᑕᕐᓯᔭᐅᒪᒍᑎᑖᕈᑏᑦ ᐃᓕᓐᓂᐊᑎᑕᐅᒍᑎᕕᓂᕐᓄᑦ ᑐᓂᔭᐅᒍᓐᓇᓂᖏᑦ ᓄᓇᕕᒃ ᓯᕗᓂᑦᓴᕘᒧᑦ ᐱᕕᑦᓴᖃᓚᕿᕗᑦ. ᔮᓐ ᐋᐸᑦ ᐃᓄᓕᒫᓅᓕᖓᔪᖅ ᖃᓪᓗᓈᑎᑐᑦ ᐃᓕᓐᓂᐊᕕᒻᒪᕆᐅᕗᖅ ᐱᒍᔨᑦᓱᓂ ᐃᓕᓐᓂᐊᑎᓂᒃ 1971-ᒥᓂᑦ. ᐅᓪᓗᒥ, ᐊᒥᓱᖕᖑᕙᓪᓕᐊᑐᐃᓐᓇᑐᑦ ᐊᑦᔨᒌᖕᖏᓂᖏᑦ ᐃᓕᓐᓂᐊᑏᑦ ᐅᓄᕐᓂᓖᑦ 6,500-ᓂᒃ ᐊᑌᓐᓇᑐᒥᒃ ᖃᐅᑕᒫᕐᓯᐅᑎᓂᒃ ᐃᓕᓐᓂᐊᑎᓂᒃ ᐊᒻᒪᓗ ᐃᓚᐅᒻᒥᑎᓪᓗᒋᑦ 2,000 ᑲᔪᓯᔪᒥᒃ ᐃᓕᓐᓂᐊᑐᐃᑦ ᐃᓕᓐᓂᐊᑏᑦ. ᐱᓇᓱᖃᑎᖃᓕᕐᑐᖅ ᑲᑐᑦᔨᖃᑎᒌᖃᑕᐅᑦᓱᓂ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᑐᓂᓯᓂᕐᒥᒃ ᓴᐳᑦᔨᓂᕐᒥᒃ ᐃᓄᐃᑦ ᐃᓕᓐᓂᐊᑎᖏᓐᓂᒃ ᓄᓇᕕᒻᒥ ᐱᓯᒪᔪᓂᒃ ᐊᕐᕌᒍᐃᑦ ᐊᕙᑏᑦ ᐅᖓᑖᓅᓕᕐᑐᖅ. ᔮᓐ ᐋᐸᑦ ᖃᕙᖕᖓᓂᖓᓃᑦᑐᖅ ᒪᓐᑐᔨᐊ ᕿᑭᕐᑕᖓᓂᒃ.

ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᓄᐃᑕᕕᓂᐅᔪᖅ ᒪᓕᑦᓱᒍ ᐊᖏᖃᑎᒌᓐᓂᖅ ᑐᓂᓯᓂᐊᕐᑎᓗᒍ ᐃᓄᓕᒫᓂᒃ ᐱᒍᑦᔨᓂᕐᒥᒃ ᓄᓇᕕᒻᒥᐅᑦ ᐃᓄᖏᓐᓂᒃ. ᐃᓄᓕᒫᓅᓕᖓᔪᖅ (ᐃᓕᕐᕐᑯᓯᖃᑎᒌᖕᖏᑐᑦ) ᑲᕙᒪᐅᑦᓱᓂ, ᑲᒪᒋᔭᑦᓴᖃᕐᓱᓂ ᓱᓇᓕᒫᓂᒃ ᑲᒪᒋᔭᖃᓲᖑᓂᒃᑯᑦ ᒥᕝᕕᓂᒃ, ᑐᓂᓯᓂᕐᓂᓗ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᓂᕐᒥᒃ, ᓴᐳᑦᔨᓂᕐᒥᓗ ᒪᙯᓐᓂᒥᒃ ᐊᒻᒪᓗ ᓄᓇᒦᑦᑎᓯᓂᕐᒥᒃ, ᐳᓖᓯᓕᕆᓂᕐᒥᒃ ᐊᒻᒪᓗ ᐊᒥᓱᒋᐊᓪᓚᓂᒃ. ᓄᓇᕕᒻᒥ ᐊᖏᓂᕐᐸᐅᓱᓂ ᐱᓇᓱᑦᑎᓯᔨᐅᓂᒃᑯᑦ.

ᒪᑭᕝᕕᑯᑦ ᐱᖁᔭᕐᑎᒍᑦ ᑭᒡᒐᑐᕐᑎᒋᔭᐅᕗᖅ ᐃᓄᓐᓄᑦ ᑯᐯᒃᒦᑦᑐᓄᑦ. ᑎᓕᔭᐅᒪᓂᖃᕐᓱᓂ ᓴᐳᑦᔨᓂᕐᒥᒃ ᐱᔪᓐᓇᐅᑎᓂᒃ, ᑲᒪᒋᒍᒪᔭᖏᓐᓂᒃ ᐊᒻᒪᓗ ᑮᓇᐅᔭᖃᕐᑎᑕᐅᒍᑎᓂᒃ ᑐᓂᔭᐅᔪᕕᓂᕐᓂᒃ ᐊᖏᖃᑎᒌᓐᓂᒧᑦ. ᑲᒪᒋᔭᖃᕆᐊᓕᒃ ᓄᐃᑦᓯᖃᑦᑕᓂᕐᒥᒃ ᐱᓇᓱᒐᑦᓴᓂᒃ, ᑎᒍᓯᒋᐊᕐᓂᒥᒃ ᒪᑭᑕᒐᓱᐊᕐᓂᒥᒃ ᐃᓅᖃᑎᒌᓐᓂᑯᓪᓗ ᐱᕙᓪᓕᐊᑎᑦᓯᓂᕐᒥᒃ, ᖁᕝᕙᑎᑦᓯᒋᐊᕐᓂᒥᒃ ᐃᓄᐃᑦ ᐃᓕᕐᕐᑯᓯᖓᓂᒃ ᐊᒻᒪᓗ ᓇᒻᒥᓂᖃᕐᓱᓂ ᐊᐅᓚᑦᓯᓱᓂᓗ ᐊᖏᔪᖑᐊᓂᒃ ᖄᖏᕐᓂᑯᓕᐅᕋᓱᐊᕐᑎᓂᒃ (ᐆᑦᑑᑎᒋᓗᒍ ᕘᔅᑦ ᐃᐊ ᐊᒻᒪᓗ ᐃᓄᐃᑦ ᖃᖓᑦᑕᔫᖏᑦ).

ᑲᑎᕕᒃ ᐃᓕᓴᕐᓂᓕᕆᓂᖅ ᓄᐃᑕᐅᓐᓂᒥᔪᖅ ᐊᖏᖃᑎᒌᓐᓂᒧᑦ ᐊᒻᒪᓗ ᐊᐅᓚᓂᖃᓕᓚᐅᔪᑦᓱᓂ ᐊᕐᕌᒍᖓᓂᒃ 1978. ᑎᓕᔭᐅᒪᓂᓕᒃ ᑐᓂᓯᓂᕐᒥᒃ ᐳᒃᑭᓂᕐᓴᓂᒃ, ᐳᕐᑐᓂᕐᓴᓂᒃ ᐊᒻᒪᓗ ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖏᓐᓂᒃ ᓄᓇᓕᖏᓐᓄᑦ ᓄᓇᕕᒻᒥ, ᐊᒻᒪᓗ ᐋᕐᕐᑭᓱᐃᔨᐅᑦᓱᓂ ᑐᑭᒧᐊᑦᑎᓯᔨᐅᑦᓱᓂᓗ ᐱᑦᔪᔭᐅᒍᑎᖏᓐᓂᒃ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᑎᓄᑦ. ᐊᐅᓚᑦᓯᓂᖃᕐᑐᖅ 17-ᓂᒃ ᐃᓕᓐᓂᐊᕕᓐᓂᒃ ᐊᒻᒪᓗ 5-ᓂᒃ ᐃᓄᒻᒪᕇᑦ  ᐃᓕᓐᓂᐊᕕᖏᓐᓂᒃ 14-ᓃᑦᑐᓂᒃ ᓄᓇᓕᓐᓂ ᓄᓇᕕᒻᒥ.

ᐊᕐᕌᒍᖓᓂᒃ 1980, ᐊᕙᑕᖅ ᓄᐃᑕᕕᓂᐅᔪᖅ ᓱᑲᑦᑐᒥᒃ ᐊᓯᑦᔨᕙᓪᓕᐊᓂᑯᖓᓄᑦ ᓄᓇᕕᒻᒥᐅᑦ ᐃᓕᕐᕐᑯᓯᖓ ᐱᑦᔪᑎᒋᒻᒥᓱᒍ ᐊᓯᑦᔩᕙᓪᓕᐊᓂᕕᓂᖓ ᐊᖏᖃᑎᒌᓐᓂᐅᔪᖅ. ᑎᓕᔭᐅᒪᒍᑎᓕᒃ ᖁᕝᕙᑎᑦᓯᒋᐊᕆᓂᕐᒥᒃ ᓴᐳᑦᔨᓂᕐᒥᓗ ᐅᖃᐅᓯᕐᒥᒃ ᐃᓕᕐᕐᑯᓯᖓᓂᓪᓗ ᓄᓇᕕᒻᒥᑦ ᐃᓄᐃᑦ.

ᓄᐃᑕᕕᓂᖅ ᐃᓕᕐᕐᑯᓯᒃᑯᑦ, ᖄᖏᕐᓂᑯᓕᐅᕐᑎᐅᒐᓂ ᑎᒥᐅᔪᖅ ᓯᑦᑎᒻᐱᕆ 2015-ᖑᑎᓪᓗᒍ, ᖄᕐᔪᐃᑦ ᐅᕕᒃᑫᑦ ᑲᑎᒪᔨᖏᑦ (QYC) ᑐᕌᒐᖃᕐᕐᑯᖅ ᐱᐅᓯᒋᐊᕆᓂᕐᒥᒃ ᐃᓅᓯᕆᔭᖏᓐᓂᒃ ᐅᕕᒃᑫᑦ ᓄᓇᕕᒻᒥ ᓯᓵᐱᒥᓪᓗ (15-ᓂᒃ 35-ᒧᑦ ᐅᑭᐅᓕᓐᓄᑦ). ᖄᕐᔪᐃᑦ ᐅᕕᒃᑫᑦ ᐱᒐᓱᐊᓲᖑᕗᖅ ᑖᑦᓱᒥᖓ ᑐᕌᒐᕐᒥ ᑐᓂᓯᓂᒃᑯᑦ ᑐᓴᕋᑦᓴᓂᒃ, ᓴᐳᑦᔨᓂᕐᒥᒃ ᐊᒻᒪᓗ ᐱᓇᓱᐊᕐᑎᓯᒍᑎᓂᒃ ᐋᕐᕐᑭᓱᕐᑕᐅᓯᒪᓗᐊᖕᖑᐊᑐᓂᒃ ᐅᕕᒃᑲᓄᑦ ᐅᕕᒃᑲᓅᓕᖓᑦᓱᑎᓪᓗ. ᑎᒥᐅᔪᖅ ᐱᕕᑦᓴᖃᖁᔨᒻᒪᑦ ᐅᕕᒃᑲᓂᒃ ᓂᐱᖃᕐᑎᓯᓂᕐᒥᒃ ᓂᐱᖃᕆᐊᖃᕐᓂᖏᓐᓄᑦ. ᓯᕗᒧᐊᑦᑎᓯᓗᑎᑦ ᐃᓄᐃᑦ ᐃᓕᕐᕐᑯᓯᕐᑎᒍᑦ ᐱᒻᒪᕆᐅᔪᖁᑎᒋᔭᖏᓐᓂᒃ ᐅᓪᓗᒥᐅᓕᕐᑐᖅ ᐃᓅᖃᑎᒌᑦ ᐱᑦᔪᑎᒋᓗᐊᖕᖑᐊᑕᖓ ᖄᕐᔪᐃᑦ ᐅᕕᒃᑫᑦ ᑲᑎᒪᔨᖏᑦ ᑐᕌᒐᖏᓐᓂᒃ.

ᓄᓇᕕᒃ ᓯᕗᓂᑦᓴᕗᑦ ᒫᓐᓇᐅᔪᖅ ᐃᑲᔪᕐᑕᐅᓂᖃᓲᖅ ᑮᓇᐅᔭᕐᑎᒍᑦ ᓴᐳᑎᔭᐅᓯᒪᓂᒃᑯᑦ ᐅᑯᓇᖕᖓᑦ:

ᑌᓯᒍᒪᒻᒥᔪᒍᑦ ᑮᓇᐅᔭᑎᒍᑦ ᐃᑲᔪᕐᓯᓂᖃᓚᐅᕐᒥᔪᑦ ᑐᓂᓯᑎᓪᓗᒋᑦ ᓄᓇᖃᕐᖄᓯᒪᔪᓂᒃ ᑕᕐᕋᒥᓪᓗ ᐱᓇᓱᕝᕕᖓᓂᒃ ᑲᓇᑕᒥ (ᐃᓄᓕᕆᔨᑐᖃᒃᑯᓂᑦ) ᐱᒋᐊᕐᓱᒍ ᐊᕐᕌᒍᖅ 2016 ᑎᑭᑦᓱᒍ 2018.

“All of the courses are unique and should be taught in all the high schools in Nunavik.”

- Lizzie Novalinga, Umiujaq

ᐅᓐᓂᓯᐅᕐᑐᑦ